Prís - veistu hvað þetta kostar?
26.júl | 2024
Prís er smáforrit (app) á vegum verðlagseftirlits ASÍ. Með appinu, sem kom út í desember í fyrra, geta notendur á augabragði skoðað mismunandi verðlagningu vara á milli verslana.
Neytendur geta hlaðið appinu niður í App Store og Play Store og tekið þátt í að veita fyrirtækjum aðhald!
Með appinu er hægt að skanna strikamerki á vörum og fá í kjölfarið uppgefið hvað varan kostar í fjölda verslana.
Verðsjá verðlagseftirlitsins
Í mars gaf Verðlagseftirlit ASÍ út mælaborð þar sem skoða má verðsamanburð milli verslana, bæði í heild, eftir vöruflokkum og niður í stakar vörur. Gögnin uppfærast daglega með nýjustu verðum sem verðlagseftirlitið hefur aflað. Með mælaborðinu hafa neytendur nú greiðan aðgang að vöruverði í ólíkum verslunum. Eru þetta sömu gögn og áður hafa aðeins verið aðgengileg í gegnum smáforrit verðlagseftirlitsins, Prís.
Verðlagseftirlit ASÍ
Markmið verðlagseftirlitsins er annars vegar að auka upplýsingastreymi til neytenda og efla þannig neytendavitund og hins vegar að veita fyrirtækjum og stofnunum aðhald. Megináhersla í störfum verðlagseftirlitsins hefur verið lögð á að skoða matvörumarkaðinn en einnig hefur sjónum verið beint að ýmsu öðru sem viðkemur pyngju neytenda.