Mansal, misneyting og eftirlitshlutverk stéttarfélaganna
24.maí | 2022
Ýmsar blikur eru á lofti á íslenskum vinnumarkaði um þessar mundir. Mikill gangur í ferðaþjónustu, lágt atvinnuleysisstig og vísbendingar um þenslu í hagkerfinu leiða að því að eftirspurn eftir starfsfólki í mannaflafrekar starfsgreinar er og verður mikil á næstu mánuðum. Því miður eru til atvinnurekendur, hér á landi sem og annars staðar, sem leita allra leiða til að fá sem ódýrast vinnuafl og skeyta litlu um aðbúnað eða aðstæður starfsfólksins. Ákveðnir hópar á vinnumarkaði eru sérstaklega berskjaldaðir fyrir misneytingu og þar má nefna aðflutt starfsfólk, flóttafólk og umsækjendur um alþjóðlega vernd.
Í dag, þriðjudaginn 24. maí, mun ASÍ halda fund á Hótel Keflavík þar sem eftirlitsfulltrúar stéttarfélaga og aðrir sem sinna því eftirliti munu koma saman og fjalla um einkenni vinnumansals, hópa sem eru sérstaklega berskjaldaðir fyrir mansali og misneytingu á vinnumarkaði og hvers konar aðstæður geta skapað jarðveg fyrir slík brot. Þá fær hópurinn innsýn í nýlega sakfellingu í vinnumansali en það er jafnframt fyrsta sakfelling í vinnumansali á Íslandi.
Frá Einingu-Iðju munu þau Vilhelm Adolfsson, Verkefnastjóri vinnustaðaeftirlits, og Rut Pétursdóttir þjónustufulltrúi mæta á fundinn.
Dagskrá fundarins er eftirfarandi:
13:00 Fundur hefst
13:05 Einkenni mansals og misneytingar á vinnumarkaði, Drífa Snædal, forseti ASÍ
13:30 Viðkvæmir hópar
Jaðarsetning austur-evrópska karla á Íslandi, Aleksandra Leonardsdóttir, ASÍ
Umsækjendur um alþjóðlega vernd, Qussay Odeh, túlkur og verkefnastjóri
Úkraína og fjöldaflótti, Gylfi Þór Þorsteinsson, aðgerðastjóri
14:10 Dæmi úr verkalýðshreyfingunni
15:00 Kaffihlé
15:10 Aðstæður í atvinnugreinum og áhætta á misneytingu, Sara S. Öldudóttir, ASÍ
15:30 Fyrsta sakfelling í vinnumansali á Íslandi
Alda Hrönn Jóhannsdóttir, lögreglunni á Suðurnesjum
Kolbrún Benediktsdóttir, saksóknari
16:40 Stuðningur við þolendur mansals, Jenný Kristín Valberg, Bjarkarhlíð
17:00 Fundi slitið