Stórefling vinnustaðaeftirlitsins

Samstarfsverkefni Alþýðusambandsins og aðildarsamtaka þess „EINN RÉTTUR-EKKERT SVINDL!“ er nú að taka á sig stöðugt skýrari mynd. Markmið er að koma í veg fyrir undirboð á vinnumarkaði, svarta atvinnustarfsemi og aðra brotastarfsemi. Aðildarfélög ASÍ vítt og breytt um landið eru nú í óðaönn að ráða starfsmenn og skipuleggja starfið hvert á sínu svæði en vinnustaðaeftirlit mun verða vaxandi þáttur í starfsemi stéttarfélaganna. Jafnframt hefur verið unnið að því að efla samstarf og samræma aðgerðir stjórnvalda og aðila vinnumarkaðarins í þessum efnum. Hvoru tveggja hefur gengið vel og mikill hugur í öllum sem að málinu koma.

Í síðustu viku var farið í sameiginlega eftirlitsferð á ferðaþjónustufyrirtæki á Suðurlandi. Markar þessi ferð ákveðin tímamót í samstarfi þeirra stjórnsýslustofnana sem koma með einum eða öðrum hætti að eftirliti á vinnumarkaði og stéttarfélagana.

Níu manns frá Ríkisskattstjóra, Vinnumálastofnun, Vinnueftirliti auk eftirlitsfulltrúa stéttarfélaganna á Suðurlandi og starfsmanni verkefnisins EINN RÉTTUR-EKKERT SVINDL!, tóku þátt. Nokkur hótel og gistiheimili á svæðinu voru tekin út og gaman að segja frá því að þessi fyrirtæki voru með hlutina í nokkuð góðu lagi. Þó vantaði nokkuð upp á aðbúnað og starfsumhverfi á einu gistiheimili og tilefni gafst til að leiðrétta ýmsan misskilning  varðandi sjálfboðaliðsstörf og réttindi starfsmanna á öðru.

Í framhaldinu munu fulltrúar þessara aðila á Suðurlandi vera í samstarfi og standa sameiginlega að vinnustaðaheimsóknum og reglubundnu eftirliti á svæðinu.

Á næstunni verður farið í svipaðar aðgerðir víðar um land. Þegar er komin dagsetning á aðgerðir á Suðurnesjum og gert ráð fyrir að fljótlega verði einnig farið á Vesturland.

Mikilvægt er að framangreindir aðilar vinni saman því það gefur aðgerðunum mun meiri slagkraft auk þess sem markmið allra er það sama þ.e. að vinna gegn brotastarfsemi á vinnumarkaði. Einnig sýnir reynslan að ef atvinnurekandi er að brjóta á sínu starfsfólki þá er yfirleitt pottur brotinn á fleiri sviðum og því er samstarf af þessu tagi bæði nauðsynlegt og árangursríkt.