Stíft vinnuplan lagt upp
27.feb | 2019
Í morgun fór fram fundur í húsakynnum ríkissáttasemjara í kjaradeilu Starfsgreinasambandsins og Samtaka atvinnulífsins. SGS vísaði kjaradeilunni til sáttasemjara í síðustu viku en þá hafði sambandið átt um 110 samningafundi með SA. Í yfirlýsingu sem SGS sendi frá sér í tilefni þess að þau sendu deiluna til sáttasemjara sagði meðal annars að sambandið teldi litlar líkur um árangur af frekari samningaumleitunum við SA.
Bryndís Hlöðversdóttir ríkissáttasemjari sagði í samtali við mbl.is að þar sem þetta hefði verið fyrsti fundir þá var verið að fara yfir praktísk atriði og leggja upp vinnuplan fyrir næstu daga og vikur. „Við erum sammála um það að leggja upp tiltölulega stíft vinnuplan fyrir dagana og vikurnar fram undan,“ sagði Bryndís við mbl.is en gert er ráð fyrir að fyrstu vinnufundir SGS og SA hefjist strax á föstudagsmorgun. „Helgin verður undir og dagarnir í vikunni fram undan. Svo verða hóparnir kallaðir inn eftir þörfum.“
Bryndís hefur jafnframt beðið samningsaðila í deilunni að tjá sig ekki við fjölmiðla. Embættið hafi tekið samskiptin yfir.
„Ég mæltist til þess að við myndum einbeita okkur að því verkefnum sem við höfum hér á borðinu svo að við fengjum vinnufrið til að sinna þeim verkefnum. Ég mun eftir þörfum gefa upplýsingar um stöðu máli en að öðru leyti tjá samningsaðilar sig ekki um viðræðurnar að svo stöddu,“ sagði Bryndís við ruv.is í morgun.