Atvinnuleysi var 3,6% í maí mánuði samkvæmt nýjum tölum Vinnumálastofnunar og hefur ekki verið lægra síðan á haustmánuðum 2008. Þannig lækkaði atvinnuleysi um hálft prósentustig milli mánaða og voru 508 færri einstaklingar atvinnulausir í maí heldur en mánuðinum á undan. Atvinnuleysi á höfuðborgarsvæðinu er 3,9% og ef horft er framhjá Suðurnesjum, þar sem atvinnuleysi er 5,7%, er atvinnuleysi lægra í öllum landshlutum heldur en á Reykjavíkursvæðinu. Á Norðurlandi eystra var 3,3% atvinnuleysi.
Karlar eru í stórum meirihluta þeirra sem féllu af atvinnuleysisskrá í síðasta mánuði, en konum fækkaði einungis um 74. Atvinnuleysi kvenna á landsvísu er 4,4% á meðan atvinnuleysi karla er 3%. Munurinn skýrist af árstíðarsveiflu, en umsvif í ákveðnum greinum fer jafnan vaxandi yfir sumartímann, sem sjá má í mikilli fækkun atvinnulausra í mannvirkjagerð og flutningastarfsemi.
Tæpur fjórðungur atvinnulausra hefur verið án atvinnu skemur en þrjá mánuði og tæpur helmingur án atvinnu skemur en sex mánuði. Þetta hlutfall hefur farið minnkandi síðustu mánuði sem bendir til þess að hlutfall langtímaatvinnulausra fari nú enn á ný vaxandi þó þeim hafi fækkað í fjölda.
Almennt má búast við jákvæðri þróun á næstu mánuðum og minnkandi atvinnuleysi yfir sumartímann. Umsvif í hagkerfinu koma til með að fara vaxandi þar sem mikil íbúðafjárfesting og stór verkefni atvinnuveganna munu ýta undir fjölgun starfa.