SGS - Vel heppnuðum fræðsludögum lokið
21.mar | 2014
Fyrr í dag lauk vel heppnuðum fræðsludögum sem Starfsgreinasambandið stóð fyrir. Viðburðinn sótti starfsfólk sem starfar á skrifstofum aðildarfélaga SGS, en alls mættu 22 fulltrúar frá 10 félögum. Þrír starfsmenn félagsins sóttu námskeiðið, en einn sat eftir veðurtepptur heima.
Á heimasíðu SGS má finna eftirfarandi frétt um námskeiðið:
Dagskráin hófst um hádegisbil í gær með gagnlegu námskeiði frá Þekkingarmiðlun.
Á námskeiðinu, sem bar fyrirsögnina „Að eiga við pirring og
óánægju“, fór leiðbeinandinn Eyþór Eðvarðsson yfir ýmis erfið mál og
aðstæður sem geta komið upp í daglegu starfi stéttarfélaganna. Dagskráin hélt svo áfram í morgun með erindum frá
Vinnueftirlitinu um Vinnuvernd og líkamsbeitingu og afar fróðlegu erindi sagnfræðingsins Magnús Sveins Helgasonar, en í erindi sínu
fjallaði Magnús um sögu verkalýðsbaráttunnar og annarra fjöldahreyfinga. Tímanum eftir það var svo að mestu varið í að kynna
nýjan innri vef Starfsgreinasambandsins og sem og kynna starfsemi og verkefni SGS fyrir gestum.
Starfsgreinasambandið stefnir á að halda álíka viðburð næsta haust fyrir þá sem ekki komust í þetta skiptið, en nokkrir einstaklingar sem boðað höfðu komu sína komust ekki í þetta skiptið vegna ófærðar. Sambandið áætlar jafnframt að gera fræðsludaga sem þessa að árlegum viðburði, enda ríkti mikil lukka meðal gesta með hvernig til tókst.