SGS - Ályktun framkvæmdatjórnar um atvinnuleysisbætur og fæðingarorlof

Töluverður árangur náðist í síðustu kjarasamningum um að hækka lægstu laun þó betur megi ef duga skal, enda ná þau ekki enn lágmarksframfærsluviðmiðum. Ef tekið er mið af umsaminni hækkun sem kemur til framkvæmda í maí á þessu ári, verði samningum ekki sagt upp, hafa lágmarkslaun hækkað um 91% á áratug. Á sama tíma hefur grunnréttur atvinnuleysistrygginga hækkað um 52,09% og grunnréttur til fæðingarorlofsgreiðslna hækkað um 51% (hámarksrétturinn hækkað um 30%).

Það er því ljóst að hvorki atvinnuleysistryggingar né fæðingarorlofsgreiðslur fylgja launaþróun. Það er skýlaus krafa framkvæmdastjórnar Starfsgreinasambandsins að atvinnuleysisbætur og fæðingarorlofsgreiðslur fylgi launaþróun enda er það hluti af kjörum fólks. Sú staðreynd að viðmiðin hafa dregist svo afturúr hækkun lágmarkslauna er kjaraskerðing þeirra sem þurfa að reiða sig á bætur vegna atvinnuleysis eða fjölgunar í fjölskyldunni.

Skorað er á stjórnvöld að leiðrétta þessa kjaraskerðingu og tryggja að bætur fylgi hér eftir umsömdum hækkunum á lágmarkslaunum.