Samningaráð SGS vísaði til sáttasemjara

Samningaráð Starfsgreinasamband Íslands vísaði fyrr í vikunni kjaradeilu sinni við SA til ríkissáttasemjara. Viðræður SGS við SA hafa engu skilað og því er kallað eftir aðkomu ríkissáttasemjara. Starfsgreinasambandið kynnti SA kröfur sínar í kjaraviðræðunum 26. janúar sl. en þeim höfnuðu Samtök atvinnulífsins strax sama dag. Kröfur SGS eru þessar:

Meginkröfur Starfsgreinasambandsins eru þessar:

• miða krónutöluhækkanir á laun við að lægsti taxti verði 300 þúsund krónur á mánuði innan þriggja ára og sérstaklega verði horft til gjaldeyrisskapandi atvinnugreina við launahækkanir.
• endurskoða launatöflur þannig að starfsreynsla og menntun séu metin til hærri launa.
• desember- og orlofsuppbætur hækki.
• vaktaálag verði endurskoðað og samræmt kjarasamningum á opinberum vinnumarkaði.
• lágmarksbónus verði tryggður í fiskvinnslu.
• skilgreind verði ný starfsheiti í launatöflu.

Gerðir hafa verið kjarasamningar við einstaka starfsstéttir undanfarnar vikur og mánuði, sem hljóta almennt að vísa launafólki veginn. Samhljómur er meðal aðildarfélaga SGS um að sú launastefna, sem hefur mótast í samfélaginu, endurspeglist í kjarasamningum SGS við Samtök atvinnulífsins.