LÝSA – upplýsandi hátíð um samfélagsmál. Við mætum, mætt þú líka!
07.sep | 2018
LÝSA – upplýsandi hátíð um samfélagsmál er sett í hádeginu í dag, en hún stendur yfir í dag og á morgun í Hofi Akureyri. Markmið hátíðarinnar er að hvetja til uppbyggjandi skoðanaskipta milli almennings, félagasamtaka og stjórnmálafólks. Á LÝSU gefst tækifæri til að varpa ljósi á málefni, eiga samtal við almenning og ráðamenn og leita eftir stuðningi við ýmis hagsmunamál. Starfsfólk félagsins auk annarra stéttarfélaga verða til viðtals í Hofi báða dagana. Að auki bjóða stéttarfélögin og VIRK upp á viðburði.
Föstudagur
- Málstofa iðnfélaganna kl. 10:45 - Verður iðnaðarmaður framtíðarinnar RÓBÓTI?
- Málþing - Akureyrarakademían og VIRK - kl. 16:30 - Kulnun er ekki einkamál!
- Sófaspjall með ASÍ kl. 17:00
- Pubquiz verkalýðsins kl. 20 á Götubarnum - Hvað veistu um verkalýðsmál, dægurmál og alls konar mál? Láttu á það reyna.
Laugardagur
- Málþing ASÍ kl. 14:00 - Hvernig er að vera útlendingur á íslenskum vinnumarkaði?
LÝSU má á margan hátt líkja við tónlistarhátíð – rokkhátíð samtalsins. Ástæðan fyrir því að fólk sækir tónlistarhátíðir er sú að það vill heyra tónlistina flutta milliliðalaust, verða vitni að því þegar galdurinn á sér stað og upplifa stemninguna með vinum og vandamönnum. Það sama á við um hátíðir á borð við LÝSU. Fólk sækir þær því það vill heyra orðin sögð í eigin persónu, án þess að skilaboðin séu bjöguð í meðförum annarra. Það vill upplifa stemninguna og kraftinn sem er í loftinu og verða innblásið af samtalinu sem á sér stað. Stjórnmálafólk vill fá tækifæri til að tala milliliðalaust við kjósendur, taka þátt í málefnalegu samtali og hlusta á íbúa landsins. Á sambærilegum hátíðum á Norðurlöndum eiga sér stað áhrifarík samskipti, þar eru teknar mikilvægar ákvarðanir og því samtali vill enginn missa af.
LÝSA stuðlar að samtali milli atvinnulífs, stjórnmála, almennings og hagsmunaafla á nýstárlegan hátt. Samtalið fer fram fyrir opnum tjöldum þar sem aðilar kynna sín hagsmunamál og fá til sín sérfræðinga sem styðja málefnin með rökum.
Hátíðin, sem hét áður Fundur fólksins, er nú haldin í fjórða sinn hér á landi og mun Eining-Iðja ásamt ASÍ, Starfsgreinasambandinu og öðrum stéttarfélögum taka virkan þátt í hátíðinni.
Vefsíða hátíðarinnar: http://www.lysa.is/