Kvennaráðstefnan „Nordisk forum“

Nú styttist óðum í kvennaráðstefnuna Nordisk forum sem haldin verður í Malmö í Svíþjóð 12. til 15. júní í sumar. Á ráðstefnunni koma saman konur frá öllum Norðurlöndunum til að ræða jafnréttismál og framtíðina. Í þau tvö skipti sem ráðstefnan hefur verið haldin hafa Íslenskar konur ekki látið sitt eftir liggja.

Þær sem hafa áhuga á að fara og eru í Einingu-Iðju eru hvattar til að hafa samband sem fyrst við Önnu Júlíusdóttur, varaformann félagsins, til að skrá sig eða fá nánari upplýsingar um ráðstefnuna, t.d. verð og styrki sem eru í boði. Athugið að síðasti dagur til að skrá sig á ráðstefnuna er mánudagurinn 17. mars nk. Hægt er að ná í Önnu, í síma 460 3600, senda á hana tölvpóst á netfangið annajul@ein.is eða kíkja á skrifstofu félagsins á Akureyri.

Eining-Iðja hefur ákveðið að taka þátt í að greiða niður þátttökugjald félagasmanna sem fara og einnig er hægt að sækja um styrk í fræðslusjóðina vegna ferðakostnaðar.

Á heimasíðu ráðstefnunnar má finna ýmsar upplýsingar um hana.

Kynningarmyndband um ráðstefnuna

Hér fyrir neðan má finna nokkra punkta um ráðstefnuna sem Starfsgreinasambandið tók saman.

Hvað er: Þing norrænna kvenna og hugmyndatorg jafnréttis. Vettvangur til að sameina krafta og brýna konur til frekari baráttu. Búist er við um 15.000 konum.

Sagan: Kvennaráðstefnan hefur verið haldin tvisvar áður, í Åbo/Turku 1994 og í Osló 1988. Íslenskar konur hafa fjölkvennt.

Hvar: Í Malmö Mässa, rétt við brúna yfir til Kaupmannahafnar.
Af hverju: Vekja áhuga á áskorunum jafnréttisbaráttunnar. Miðla þekkingu og hugmyndum. Búa til kröfur og tillögur að jafnréttispólitík. Búa til tengslanet. Styrkja konur á Norðurlöndunum og víða.

Áherslur:

1. Femínískt hagfræði – hagræn og félagsleg þróun
2. Líkamar kvenna og stúlkna – kynfrelsi og heilbrigði
3. Konur á vinnumarkaði, launajafnrétti, menntun og starfsframi
4. Ofbeldi gegn konum og stúlkum
5. Umhverfi, loftslag og sjálfbær þróun
6. Umönnunarstörf og velferðarsamfélagið
7. Friður og öryggi
8. Stjórnmálaþátttaka kvenna og þróun hennar
9. Kynjasamþætting og jafnréttisstarf í fyrirtækjum
10. Flóttamenn og fólksflutningar
11. Framtíð femínismans á Norðurlöndum og skipulag kvennahreyfingarinnar
12. Ný tækni og fjölmiðlar

Skipulag: Undir hverju áhersluatriði verða tvö málþing. Sterkir fyrirlesarar verða í stóra salnum. Menning og uppákomur verða skipulagðar á svæðinu og í Malmöborg. Einstaka hópar kaupa sig inn í dagskrána (eins og verkalýðshreyfingin).

Kostnaður: Ráðstefnugjaldið er 800 sænskar krónur ef greitt er fyrir 22. mars, eftir það er það 1.000 sænskar krónur. Innifalið í pakkanum eru ferðir almenningssamgangna um Malmö og Lund. Ódýrara fyrir fólk í atvinnuleit og námsmenn. Flugmiðinn kostar á bilinu 50.000-63.000, verð á gistingu er mjög misjafnt. Fræðslusjóðir verkalýðsfélaganna niðurgreiða kostnaðinn, ýmist bæði ferðakostnað og ráðstefnugjald eða bara ráðstefnugjaldið.

Tungumál: Ráðstefnan fer fram á skandinavísku og ensku. Alltaf er eitthvað í gangi á ensku þannig að það er ekki nauðsynlegt að kunna eitthvert skandinavísku málanna.