Kjaraviðræðum hætt
05.des | 2013
Samninganefnd ASÍ hefur á undanförnum vikum unnið að því að leggja grunn að aðfarasamningi við Samtök atvinnulífsins, þar sem þess yrði freistað að ná auknum kaupmætti, tryggja stöðugleika í efnahagsmálum og lága verðbólgu. Ágætur árangur hefur náðst um umgjörð slíks samnings. Í dag kom hins vegar í ljós djúpstæður ágreiningur við SA um launalið væntanlegs samnings, einkum það sem snýr að hækkun lægstu launa. Svo langt er á milli aðila að samninganefnd ASÍ telur forsendur brostnar fyrir þeirri leið sem átti að varða. SA hafnar þeirri kröfu ASÍ að hækka lægstu laun um ákveðna krónutölu.
Því hefur samninganefnd ASÍ tilkynnt SA að viðræðum á þessum grunni sé hætt. Framhald viðræðna um gerð nýrra kjarasamninga er í höndum aðildarsamtaka ASÍ.
Mikil vonbrigði
Björn Snæbjörnsson, formaður Einingar-Iðju og Starfsgreinasambands Íslands, segir það mikil vonbrigði að Samtök atvinnulífsins hafi ekki
viljað krónutöluhækkun, sem er sú leið sem gagnast best þeim sem eru með lægstu launin. "Þetta er okkar helsta baráttumál.
Samninganefnd SGS mun hittast á morgun og fara yfir þá stöðu sem upp er komin."