Bjarg íbúðafélag og IKEA í samstarf um hagkvæmar íbúðir
07.nóv | 2018
Bjarg íbúðafélag og IKEA hafa gert samkomulag um samstarf vegna íbúða Bjargs. Í samkomulaginu fellst að Bjarg mun leitast við að nota innréttingar IKEA í íbúðir félagsins. IKEA mun taka þátt í hönnunarferli íbúða og útfæra innréttingarnar með það að markmiði að ná fram hámarksnýtingu rýma. Þetta kemur fram á bjargibudafelg.is
Áhersla Bjargs er veita leigutökum öruggt húsnæði til langs tíma, því er mikilvægt að leigutakar geti aðlagað íbúðir að sínum þörfum. Með samstarfinu geta leigutakar aðlagað íbúðir með lausnum frá IKEA eftir að þeir eru fluttir inn. Sérstakur IKEA bæklingur vegna íbúða Bjargs verður útbúinn samhliða hönnun þeirra.
Björn Traustason, framkvæmdastjóri Bjargs. “Bjarg leitar allra leiða til að framleiða hagkvæmar íbúðir og þjónusta leigutaka á sem bestan hátt. Samstarf við IKEA uppfyllir bæði þessi markmið.
Að gefa leigutökum tækifæri að aðlaga íbúðir að sínum þörfum með aðgengi að lausnum á viðráðanlegu verði er nýjung á leigumarkaði og hlökkum við til samstarfsins við IKEA.”
Þórarinn Ævarsson, framkvæmdastjóri IKEA. “Við hjá IKEA erum stolt af því að fá að taka þátt í þessu krefjandi verkefni með Bjargi. IKEA hefur um árabil verið leiðandi í hönnun á innréttingum þar sem áhersla er lögð á að nýta takmarkað pláss sem best og á sem hagkvæmustu verði.”
Uppbygging
Leiðarljós félagsins er að byggja vel hannað, hagkvæmt og endingargott leiguhúsnæði. Félagið hefur samið við hin ýmsu sveitarfélög um byggingu og á í viðræðum við önnur sveitarfélög. Bjarg er nú með tæplega 271 íbúðir í byggingu og um 397 í hönnunarferli. Áætlað er að fyrstu íbúðir verði afhentar leigutökum 1. júní 2019.
Framkvæmdir hafnar
- Móavegur 2-12, Grafarvogi 155 íbúðir. Fyrsta skóflustunga var tekin í febrúar 2018. Afhending fyrstu íbúða áætluð 1. júlí 2019.
- Urðarbrunnur 130-132 og 33, Úlfarársdal, 83 íbúðir. Fyrsta skóflustunga var tekin í apríl 2018. Afhending fyrstu íbúða áætluð 1. september 2019.
- Akranes, 33 íbúðir að Asparskógum 12, 14 og 16. Fyrsta skóflustunga var tekin í október 2018. Afhending íbúða er 1. júní og 1. júlí 2019.
Framkvæmdir í undirbúningi
- Hallgerðargata, við Kirkjusand, í Reykjavík. 80 íbúðir. Í undirbúningi.
- Leirtjörn, Úlfarársdal í Reykjavík. 82 íbúðir. Í undirbúningi.
- Bryggjuhverfi, Reykjavík. 29 íbúðir. Í undirbúningi.
- Vogabyggð, Gelgjutanga, Reykjavík. 75 íbúðir. Í undirbúningi.
- Hraunbær, Árbæ, Reykjavík. 92 íbúðir. Í undirbúningi.
- Skerjafjörður, Reykjavík. 100 íbúðir. Í undirbúningi.
- Akureyri, 26 íbúðir (í Guðmannshaga 2). Í undirbúningi.