Atvinnuleysi í maímánuði ekki lægra síðan 2005

Samkvæmt Vinnumarkaðsrannsókn Hagstofu Íslands voru að jafnaði 203.600 manns á aldrinum 16-74 ára á vinnumarkaði í maí 2016, sem jafngildir 86,1% atvinnuþátttöku. Af þeim voru 195.400 starfandi og 8.200 án vinnu og í atvinnuleit. Hlutfall starfandi af mannfjölda var 82,7% og hlutfall atvinnulausra af vinnuafli var 4,1%. Samanburður mælinga fyrir maí 2015 og 2016 sýnir að atvinnuþátttakan jókst um tvö prósentustig. Fjöldi starfandi jókst um 12.500 og hlutfallið af mannfjölda jókst um 4,2 stig. Atvinnulausum fækkaði um 5.000 manns og hlutfall þeirra af vinnuaflinu minnkaði um 2,7 prósentustig. Atvinnuleysi hefur ekki mælst jafn lágt í maímánuði síðan árið 2005 þegar það mældist einnig 4,1%.

Flæðirit – Vinnumarkaður 16-74 ára maí 2016

Samtala undirliða þarf ekki að koma heim við heildartölur vegna námundunar.

Árstíðaleiðrétt atvinnuleysi 2,2% í maí
Íslenskur vinnumarkaður sveiflast reglulega milli mánaða vegna árstíðabundinna þátta. Samkvæmt mælingum Hagstofu Íslands hefur atvinnuleysi alltaf aukist á milli apríl og maí vegna aukinnar eftirspurnar ungs fólks (16-24 ára) eftir sumar- og/eða framtíðarstörfum. Atvinnuleysi þróaðist með öðrum hætti nú í maí en árin á undan þar sem á heildina dró úr atvinnuleysi á milli mánaða og hefur það nokkur áhrif á árstíðaleiðréttingu atvinnuleysistalna. Samkvæmt árstíðaleiðréttingu var atvinnuleysi 2,2% í maí samanborið við 4% í apríl. Leitni árstíðaleiðrétts atvinnuleysis síðustu 6 mánuði sýnir að atvinnuleysi hefur lækkað um 0,3 prósentustig. Ef litið er til síðustu tólf mánuði hefur atvinnuleysi lækkað um 0,8 stig.

Framkvæmd
Maí 2016 nær til fjögurra vikna, eða frá 2. til 29. maí. Úrtakið var 1.217 einstaklingar á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.173 einstaklingar. Alls fengust nothæf svör frá 865 einstaklingum sem jafngildir 73,7% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,2 stig, hlutfall starfandi ±2,5 stig og og atvinnuleysi ±1,5 stig. Allar fjöldatölur eru afrúnaðar að næsta hundraði. 

Allar tölur fyrir fyrstu tvo mánuði nýjasta ársfjórðungs eru bráðabirgðatölur þar til ársfjórðungi lýkur.

Talnaefni