ASÍ - Fyrri hringferð lokið
31.maí | 2018
Frá fundinum á Akureyri
Fyrr í maí hélt skrifstofa ASÍ í fundarherferð um landið þar sem haldnir voru 10 fundir til að undirbúa 43. þing Alþýðusambandsins sem fer fram 24. til 26. október 2018. Neðst í fréttinni má sjá þau fimm atriði sem fengu flest atkvæði í hverjum málaflokki fyrir sig á fundinum sem fram fór á Akureyri 3. maí sl.
Á fundunum voru þrjú af viðfangsefni þingsins kynnt með stuttum framsögum auk þess sem Gylfi Arnbjörnsson hélt erindi um áskoranir á vinnumarkaði og valkosti í kjarabaráttu (sjá hér). Þá ávarpaði formaður stéttarfélags á staðnum hvern fund. Eftirfarandi málefni voru til umfjöllunar:
a. Tekjuskipting og jöfnuður
b. Tækniþróun og skipulag vinnunnar
c. Jafnvægi atvinnuþátttöku og einkalífs
Tilgangur fundanna var að auðvelda þátttakendum að tjá sig um það sem á þeim brennur, kynna þeim viðfangsefnin og gera þeim kleift að koma með ábendingar og tillögur að áherslum og aðgerðum af hálfu Alþýðusambandsins og aðildarfélaganna. Notast var við fundarform sem byggir á sem mestri virkni fundarmanna.
Eftir seinni fundarröðina sem farin verður í september (þá verður rætt um húsnæðis- og velferðarmál) verða lögð fyrir miðstjórn drög að stefnuyfirlýsingu og aðgerðaráætlun byggð á niðurstöðum fundanna, sem síðan verður lögð fyrir 43. þing ASÍ til frekari umfjöllunar og afgreiðslu.
Á fundinum sem fram fór á Akureyri 3. maí fengu eftirtalin fimm atriði fengu flest atkvæði í hverjum málaflokki fyrir sig.
Tekjuskipting og jöfnuður
- Hækka persónuafslátt 23
- Styttri vinnuviku 17
- Lágmarkslaun fylgi lágmarks framfærslu 17
- Félagslegt húsnæðiskerfi (verkamannabústaði) 12
- Leigufélög sem ekki eru byggð á gróðamarkmiðum 10
Tækniþróun og skipulag vinnunnar
- Forgangur-ríkisstarfsmenn og fólk á almennum vinnumarkaði eiga að hafa sömu réttindi 21
- Sveigjanleiki vegna veikinda í fjölskyldunni 20
- Stytta vinnuvikuna án skerðingar launa 13
- Stytta vinnuvikuna og hækka yfirvinnuálag 9
- Vinnuvikan verði ekki meira en 4 dagar eða 32 tíma á mannsæmandi launum fyrir alla 9
Jafnvægi atvinnuþátttöku og einkalífs
- Auka þarf símenntun og endurmenntun til að fólk nái að fylgja eftir tækniþróun 21
- Aukin samvinna milli félaga (sameiningar?) 20
- Lögverndun starfa 14
- Verja frítímann. (stoppa á símtöl og tölvupósta utan vinnu) 10
- Hluti lífsleiknináms ætti að vera hvetjandi til aukinnar þátttöku ungs fólks í verkalýðsmálum 10