25. nóvember - alþjóðlegur baráttudagur gegn ofbeldi gagnvart konum

Verkalýðsfélög og atvinnurekendur leika lykilhlutverk í því að gera vinnustaði örugga fyrir konur. Það er kunnara en frá þurfi að segja að konur verða mun frekar fyrir ofbeldi á vinnustað en karlar, hvort sem er kynferðisleg áreitni eða líkamlegt ofbeldi. Ofbeldið undirstrikar þá kerfislægu kynjamismunun sem gegnsýrir vinnustaði og samfélög víða um heim. Alþjóðlegur baráttudagur Sameinuðu þjóðanna gegn ofbeldi gagnvart konum, sem er laugardaginn 25. nóvember, er kjörið tækifæri fyrir stéttarfélög um allan heim til að taka málin í sínar hendur og ráðast gegn kynbundnu ofbeldi á vinnumarkaði.

Þrátt fyrir fjölda rannsókna sem sýna að ofbeldi fer vaxandi á vinnumarkaði víða um heim þráast bæðir ríkisstjórnir og atvinnurekendur við að koma að gerð alþjóðlegs sáttmála sem vinnur gegn kynbundnu ofbeldi og verkalýðshreyfingin hefur hvatt til að verði samþykktur. Slíkur sáttmáli verður einmitt til umræðu á þingi Alþjóðavinnumálastofnunarinnar (ILO) í Genf í júní á næsta ári. Það er verkefni verkalýðshreyfingarinnar að búa til nægjanlegan þrýsting meðal almennings til að koma slíkum sáttmála í gegnum ILO-þingið. Það væri strax áfangasigur í baráttunni gegn ofbeldi gagnvart konum.

Í yfirlýsingu frá Evrópusamtökum verkalýðsfélaga (ETUC), í tilefni dagsins, sagði framkvæmdastjórinn Luca Visenti: „Verkalýðsfélög og atvinnurekendur leika lykilhlutverk í því að gera vinnustaði örugga fyrir konur, að útrýma bæði áreitni og ofbeldi gagnvart konum úr vinnuumhverfi þeirra. Almennir kjarasamningar eru t.d. gott verkfæri í þeirri baráttu.“